Rom 3 | AOJFILIFITA | STEP | DeiꞋ esis Juda sikilaꞋ enis epes owaꞋ Judaisi ma maina waf buꞋunai? Maina waf buꞋunai natagama waf anama satopaꞋ alopanai?

Romans 3

God naila basef Ananimi atom

1 DeiꞋ esis Juda sikilaꞋ enis epes owaꞋ Judaisi ma maina waf buꞋunai? Maina waf buꞋunai natagama waf anama satopaꞋ alopanai? 2 Waf buꞋunai hianai natagamana. Waf naliꞋi anama. God naliꞋ naseꞋasa basef Ananimi endilisimi atom esis Juda ma sumafiam silam. 3 Endilisi, enis ina sombaleꞋefa basef amama andeandeꞋ. EaꞋ deiꞋ ataꞋ siꞋi main? AꞋi waf anama aonai esis sandaꞋanai anona nemaf nondaꞋ God nokwaha basef endilisimi Ananimi? 4 OwaꞋetin. ApeꞋ miꞋi basef miꞋi, epes hiesi sambasoꞋami, eaꞋ God atona naꞋi basef endilisimi laꞋelaꞋef nandaꞋ maol andeandeꞋ siꞋi Baibel naꞋiam,

“Amam nematawa hiesi semeꞋ basef ineꞋimi siꞋi endilisimi atom. Nemaf anama enis epes siꞋi sondaꞋmena basef, ineꞋ nikilaꞋas.”
5 DeiꞋ iꞋipipa anom basef apeꞋ epes ukup maꞋiami. Basef amama naꞋama. DeiꞋ ataꞋ mama? IꞋi waf aonai apeꞋ mandaꞋanai nawalapa waf buꞋunai Godi nataga alihina, apeꞋ nambimb miꞋiam miꞋimama? MiꞋi God nandaꞋ waf aonai okom wandafunai nogwamapa waf aonai apeꞋ mandaꞋanai? OwaꞋetin. IꞋi God nondaꞋ waf aonai, deiꞋ Anan nowaloga waf amam nematawa hiesi sandaꞋanai ma main? OwaꞋetin. 7 Enis epes ukup maꞋi etin sambasoꞋam saꞋi naꞋama saꞋi, “IꞋi epes hiesi siti waf aonai apeꞋ mandaꞋanai noloma waf Godi endilisinai ma sowalogana, sogawa waf Godi nikilaꞋ waf apeꞋ mandaꞋanai. EaꞋ waf apeꞋ mandaꞋanai nawalapa agel Godi luꞋuna. EaꞋ naꞋama God ina nambimb nogwamapa waf aonai apeꞋ mandaꞋanai, owaꞋ.” OwaꞋetin. Epes isima sambasoꞋami. 8 IꞋi apeꞋ mila basef amama basoꞋmaimi, mefeꞋ mefeꞋ miꞋi,

“Awi, apeꞋ mondaꞋ waf aonai ma muwalapai waf buꞋunai Godi.”
Endilisi, enis epes sambasoꞋam saꞋi basef findiwama aeꞋ saꞋi aeꞋ aꞋiam naꞋama. OwaꞋetin. Epes isima saꞋi basef amama, anona nemaf God nogwamasa waf aonai esis sandaꞋanai.

Ina enin epen boꞋwen andeandeꞋ nape, owaꞋetin

9 DeiꞋ siꞋi main? Basef amama doꞋokimi maꞋi main? MaꞋi apeꞋ Juda mikilaꞋ enis epes owaꞋ Judaisi ma waf buꞋunai? OwaꞋetin. AeꞋ ihiꞋambepa basef eaꞋ, waf aonai naseꞋala apeꞋ hiapai, esis Juda saloma isima owaꞋ Judaisi wapotiꞋ. 10 Baibel naꞋi naꞋama naꞋi,

“Ina enin epen boꞋwen andeandeꞋ nape, owaꞋetin. 11 Ina enin epen negawa waf buꞋunai. Ina enin epen nandaꞋ maol nagolopa God, owaꞋ. 12 Epes hiesi sololama eaf buꞋunai sataga epes sandaꞋ waf aonai. Ina enin epen nandaꞋ waf buꞋunai, owaꞋ. Ina enin atitin boꞋwen. 13 Malogof asasimi mandahama siꞋi hiꞋagilif sawa epes sagaꞋi, mindihianama alihim mape. Esis saꞋi basef hiami basoꞋmaimi maloma basef hiami mamumami ma sahambombaga enis epes siꞋi numbut nape igufi naha epes sagaꞋi. 14 LaꞋelaꞋef ukup asasimi wandafum endilisi saꞋi basef awami atoma saseꞋa nimanimi enis epes. 15 Esis mehip saha enis epes sagaꞋ. 16 LaꞋelaꞋef sahambombaga epes hiesi saseꞋasa nimanimi hiami. 17 Opalef asasimi ina mape awanem seape opalef atifim soloma enis epes, owaꞋ. 18 Esis ina ukup maimaila God umbamahasana ma saila waf Ananinai, owaꞋ.”
19 EaꞋ deiꞋ apeꞋ mogawa maim basef Godi mape miꞋuli Anan fowaꞋ nasoꞋ Mosesanai naꞋi apeꞋ Juda mope owina miꞋuli anama milana. EaꞋ ina laꞋifipa mailana andeandeꞋ, owaꞋ. EaꞋ ina enin epen laꞋifina niꞋi, “AeꞋ epen buꞋuwei andeandeꞋ,” owaꞋetin. ApeꞋ epes hiapai ganima hiagoma, ofagema mapoma apeꞋ ma naep Godi anona nemaf nowaloga apeꞋ nowalapa waf aonai apeꞋ mandaꞋanai. 20 DeiꞋ main, waf anama maila miꞋuli anama, owaꞋ enin epen atitin anona nemaf nefaꞋ agel epen buꞋunai andeandeꞋ ma naep Godi, owaꞋ. MiꞋuli anama nihiꞋambapa waf aonai apeꞋ mandaꞋanai.

Emi egafis sembaleꞋefa Kraisi, esis agof mataga epes buꞋwasi Godi

21 EaꞋ deiꞋ waf buꞋunai Godi nataga alihiguma nandawalap. Anama ina nataga nagiꞋma waf saila miꞋuli fowaꞋ gani God nasoꞋ Mosesanai, owaꞋ. Anama nataga anona eaf naꞋama. Basef hiami Godi mail buki mawalapai waf anama. Anom mail miꞋuli anama God fowaꞋ nasoꞋ Mosesanai eaꞋ anom amam profet hiami mandaꞋanai. 22 Waf anama naꞋama. Emi egafis sembaleꞋefa Jisas Kraisi, isima God nofalas naꞋi epes buꞋwasi. EaꞋ apeꞋ epes hiapai mombaleꞋefa Kraisi, God nandaꞋapa naꞋama etin, esis Juda saloma isima owaꞋ Judaisi wapotiꞋ. 23 ApeꞋ epes hiapai mandaꞋ waf aonai mumbisilaꞋ miꞋuli Godi eaꞋ ina laꞋifipama anona nemaf muti mafifili buꞋunai Ananinai, owaꞋ. 24 EaꞋ God nati apeꞋ uwahipipa nandahomapa. ApeꞋ mombaleꞋefa Krais Jisas eaꞋ God naꞋi apeꞋ epes buꞋupai. ApeꞋ ina maseꞋana anom amamaga matalona, owaꞋ. Anan nagiambamapa ma Krais Jisas eaꞋ natagahepa natalapa ma mape wafifipa.

25 God nihiꞋambasana Krais Jisas alihina ma amam nematawa hiesi naꞋama. Anan nagaꞋ esimbel ananimi malo maliꞋamona okom wandafunai Godi ma nakwaha waf aonai emi egafis sembaleꞋefanai. GaꞋ Krais Jisasi atona deiꞋ God nihiꞋambapa waf buꞋunai naꞋama. FowaꞋ nandaꞋ esis amam nematawa saꞋosaꞋombemas eaꞋ ina nogwamasa waf aonai esis sandaꞋanai, owaꞋ. 26 Anan nandaꞋam naꞋama ma nogwamasa waf aonai esis sandaꞋanai ma deiꞋ nihiꞋambapa waf buꞋunai ananinai nataga alihiguma. Amama atom deiꞋ apeꞋ mogawa Anan buꞋunai endilisi naꞋi emi egafis sembaleꞋefa Jisasi sataga epes buꞋwasi.

27 EaꞋ deiꞋ apeꞋ eaf aꞋapa ma mefela agof apeꞋimi atom luꞋum, owaꞋ. Eaf anama eaꞋ nasoꞋ. Main deꞋim mahefa eaf anama? AꞋi waf anama maila miꞋuli God nasoꞋ Mosesanai? OwaꞋetin! Waf mombaleꞋefa Jisasanai atona nahopa eaf anama. 28 ApeꞋ mogawa emi egafis sembaleꞋefa Jisas atona, God naꞋi esis sataga epes buꞋwasi andeandeꞋ. EaꞋ esis ina saila miꞋuli anama God fowaꞋ nasoꞋ Mosesanai, owaꞋ.

29 DeiꞋ mama? AꞋi God Anan Dembinai esis Judai atona? OwaꞋetin. Anan Dembinai esis isima owaꞋ Judaisi wapotiꞋ. 30 DeiꞋ main, God anan anama atona. Anan naꞋi basef atifim mafeꞋma epes hiesi. Emi egafis sembaleꞋefa Krais Jisasi, nambimb God niꞋi esis epes buꞋwasi andeande, esis Juda saila waf satopaꞋ alopanai saloma isima owaꞋ Judaisi wapotiꞋ. 31 Amama atom deiꞋ baleꞋef anama apeꞋ ina miꞋi apeꞋ matopaꞋ basefa miꞋuli anama God fowaꞋ nasoꞋ Mosesanai, owaꞋ. ApeꞋ mombaleꞋefa Krais Jisas deiꞋ mawalapa basef ofagema ma miꞋuli anama.